کرونا وائرس کا خطرہ، بڑے نقصانات کے ساتھ ساتھ کچھ فوائد بھی سامنے آگئے

نیویارک(ویب ڈیسک) کرونا وائرس نے دنیا کے تقریباً تمام ہی ممالک کو 

خوفزدہ کررکھا ہے اور لاک ڈائون کی وجہ سے بین الاقوامی معیشت تنزلی کا شکار ہے البتہ ماہرین نے انکشاف کیا ہے کہ وبا پھیلنے کے بعد چند ایسی تبدیلیاں دیکھنے میں آئیں جو دنیا اور انسانوں کے لیے نہ صرف خوش گوار ہیں کہ ہمیں ان کی اشد ضرورت بھی تھی۔

کرونا وائرس سے تک اب تک دنیا کے 198 ممالک کے چار لاکھ سے زائد افراد متاثر ہوچکے جبکہ 22 ہزار سے زائد ہلاکتیں اور 1لاکھ 18 ہزار سے زیادہ مریض صحت یاب بھی ہوئے۔عالمی ادارہ صحت (ڈبلیو ایچ او) کی جانب سے وبا قرار دیے جانے والے کرونا وائرس کی روک تھام کے لیے دنیا کے مختلف ممالک نے اپنے اہم شہروں کو لاک ڈائون کر رکھا ہے جبکہ دفاتر، تعلیمی ادارے اور شاپنگ مالز بھی بند ہیں۔پاکستان سمیت دنیا بھر میں جہاں کرونا وائرس کے منفی اثرات دیکھنے کو ملے ان میں کچھ ایسے مثبت اشارے بھی نظر آئے جو ملکی معیشت کے لیے خوش آئند ہے۔

ہاتھ دھونے کی پابندی

کرونا وائرس کے پیش نظر دنیا بھر کے طبی ماہرین نے لوگوں کو ہر پندرہ منٹ بعد ہاتھ دھونے کی تلقین کی ہے، اس وبا کی وجہ سے شہری باقاعدگی کے ساتھ ہاتھ دھو رہے ہیں جو اچھی صحت کے لیے بہت ضروری ہے۔امریکی ادارے ’سینٹر فور ڈیزیز کنٹرول اینڈ پریوینشن‘ کے مطابق کوئی بھی جراثیم یا وائرس ہاتھ کے ذریعے ہی جسم میں داخل ہوتا ہے، اس لیے ضروری ہے کہ ہاتھوں کو صاف رکھا جائے اور بالخصوص کھانے پینے سے پہلے ہاتھ باقاعدگی سے دھوئیں جائیں۔

پیٹرولیم مصنوعات کی قیمتوں میں کمی

کرونا وائرس کے سبب صنعتوں کے بند ہونے اور شہر لاک ڈائون ہونے کی وجہ سے پیٹرولیم مصنوعات کی طلب کم ہوئی جس کی وجہ سے عالمی سطح پر پیٹرولیم مصنوعات کی قیمتوں میں نمایاں کمی ریکارڈ کی گئی۔خام تیل کی زیادہ پیداوار اور رسد کم ہونے کی وجہ سے عالمی منڈی میں قیمتوں میں واضح فرق پڑا ہے۔ اسی صورتِ حال کے پیشِ نظر پاکستان میں بھی پیٹرول اور ڈیزل کی 

قیمتیں 15 روپے فی لیٹر تک کم کی گئی ہیں۔

تیل کی قیمتیں کم ہونے سے ہونے والا معاشی فائدہ

ماہرین معاشیات کے مطابق عالمی منڈی میں خام تیل کی قیمتوں میں کمی کے بعد تیل درآمد کرنے والے ملکوں کی معیشت کو اس صورت حال کا خاصا فائدہ ہو سکتا ہے اور تیل درآمد کر کے اربوں ڈالر بچا سکتا ہے۔

فضائی آلودگی میں نمایاں کمی

کرونا وائرس پھیلنے والے ممالک میں پیداواری صنعتوں کو بند کیا گیا ہے جبکہ سڑکوں سے ٹرانسپورٹ بھی غائب ہے۔ حال ہی میں موسمیاتی تبدیلیوں پر نظر رکھنے والے ادارے نے کچھ تصاویر جاری کیں تھیں جن میں بتایا گیا تھا کہ فضائی آلودگی میں نمایاں کمی ہوگئی جس کی وجہ سے آلودہ شہروں کا ایئرکوالٹی انڈیکس بھی بہت بہتر ہوا۔

تفریح مقامات اور شاہرائوں کی صفائی

کرونا وائرس کے تدارک کے لیے جہاں مختلف ممالک کی حکومتوں نے عوامی اجتماعات پر پابندی عائد کی وہی شہریوں کو تفریح مقامات پر جانے سے روک دیا۔ تفریح مقامات پر عوام کے نہ جانے سے وہاں صفائی ہے جبکہ گلیاں اور شاہرائیں بھی صاف نظر آرہی ہیں۔